ضلع بھر میں شجرکاری مہم کو مزید مؤثر بنانے کا فیصلہ، ڈپٹی کمشنر بابر صاحب دین نے افسران کو ہدایات جاری کر دیں

ضلع بھر میں شجرکاری مہم کو مزید مؤثر بنانے کا فیصلہ، ڈپٹی کمشنر بابر صاحب دین نے افسران کو ہدایات جاری کر دیں۔ اس حوالہ سےڈپٹی کمشنر بابر صاحب دین کی زیرِ صدارت ضلعی محکموں کے افسران کا اجلاس منعقد ہوا، جس میں ضلع بھر میں جاری پلانٹیشن مہم، شجرکاری کے اہداف اور آئندہ کے لائحہ عمل کا تفصیلی جائزہ لیا گیا۔ اجلاس میں متعلقہ افسران کی جانب سے ضلع بھر میں جاری شجرکاری مہم کے حوالے سے ڈپٹی کمشنر کو تفصیلی بریفنگ دی گئی۔ اجلاس میں فیصلہ کیا گیا کہ سرکاری دفاتر، اربن ایریاز، بائی پاسز، شاہراہوں اور دیگر موزوں مقامات پر زیادہ سے زیادہ پودے لگائے جائیں گے تاکہ ضلع کو سرسبز و شاداب بنانے کے ساتھ ساتھ ماحولیاتی آلودگی میں بھی کمی لائی جا سکے۔ڈپٹی کمشنر بابر صاحب دین نے ہدایت کی کہ شجرکاری مہم کو محض پودے لگانے تک محدود نہ رکھا جائے بلکہ لگائے گئے پودوں کی نگہداشت اور ان کی مناسب نشوونما کو بھی یقینی بنایا جائے۔ انہوں نے کہا کہ پلانٹیشن مہم میں سول سوسائٹی، طلبہ، اساتذہ اور دیگر طبقات کو بھرپور طور پر شامل کیا جائے تاکہ شجرکاری کے عمل کو ایک اجتماعی مہم کی شکل دی جا سکے۔ انہوں نے متعلقہ افسران کو تعلیمی اداروں میں بھی زیادہ سے زیادہ پودے لگانے کا ٹاسک سونپتے ہوئے ہدایت کی کہ طلبہ میں درختوں کی اہمیت اور ماحولیاتی تحفظ کے حوالے سے شعور اجاگر کیا جائے۔ ماحولیاتی بہتری اور سرسبز و شاداب ضلع کے قیام کے لیے تمام متعلقہ محکمے باہمی رابطے اور مربوط حکمت عملی کے تحت شجرکاری مہم کو آگے بڑھائیں۔ انہوں نے اس عزم کا اظہار کیا کہ ضلع بھر میں شجرکاری کے دائرہ کار کو مزید وسیع کیا جائے گا اور پودوں کی حفاظت و نگہداشت پر بھی خصوصی توجہ دی جائے گی۔