پاکستان کے افغانستان میں فتنہ الخوارج اور فتنہ الہندوستان کے ٹھکانوں پر فضائی حملے

پاکستان نے افغانستان میں فتنہ الخوارج اور فتنہ الہندوستان سے وابستہ دہشت گرد تنظیموں کے ٹھکانوں اور محفوظ پناہ گاہوں پر منظم اور متوازن فضائی حملے کیے ہیں، جن میں کئی دہشت گرد ہلاک ہو گئے ہیں۔

حملوں کی تفصیلات بتاتے ہوئے وزارت اطلاعات و نشریات نے ایکس پر اپنی پوسٹ میں کہا کہ مصدقہ اطلاعات کی بنیاد پر افغانستان میں فتنہ الخوارج، فتنہ الہندوستان اور ان کے اتحادیوں سے وابستہ دو مقامات پر

دہشت گردوں کے کیمپوں اور محفوظ پناہ گاہوں کو درستی اور مہارت سے نشانہ بنایا گیا۔

وزارت نے کہا کہ اہداف کو درستگی سے تباہ کر دیا گیا ہے اور ابتدائی اطلاعات کے مطابق بائیس دہشت گرد ہلاک ہوئے ہیں۔

ان ٹھکانوں میں ذخیرہ کیا گیا بھاری مقدار میں اسلحہ اور گولہ بارود بھی تباہ کر دیا گیا۔

وزارت اطلاعات و نشریات نے تشویش کا اظہار کیا کہ افغانستان بدستور دہشت گردی کا مرکز بنا ہوا ہے۔

وزارت اطلاعات و نشریات نے کہا کہ سکیورٹی فورسز اور قانون نافذ کرنے والے اداروں کی جانب سے عزم استحکام کے وژن کے تحت غیر ملکی سرپرستی اور حمایت سے ہونے والی دہشت گردی کے خاتمے کیلئے پاکستان کی انسداد دہشت گردی کی جاری مہم غضب للحق پوری رفتار سے جاری رہے گی۔