جھنگ تھل ڈیزرٹ جیپ ریلی کے دوران حادثہ،مبینہ طور پیراگلائیڈر کو آگ لگنے سے پائلٹ جاں بحق، 14 سالہ لڑکا زخمی، میت پشاور روانہ

جھنگ: 18 ہزاری کے علاقے میں تھل ڈیزرٹ جیپ ریلی کے دوران لینڈنگ کرتے ہوئے ایک پیراگلائیڈر میں آگ لگنے سے پائلٹ جاں بحق جبکہ 14 سالہ لڑکا زخمی ہوگیا۔ حادثے کی وجوہات تاحال معلوم نہیں ہوسکیں۔

ذرائع کے مطابق حادثے میں جاں بحق ہونے والے پیراگلائیڈر پائلٹ کی شناخت قاضی ظفر ولد قاضی فرہاد کے نام سے ہوئی ہے، جن کی عمر تقریباً 40 سال بتائی گئی ہے۔ ان کا تعلق لنڈی یرغجو، تحصیل و ضلع پشاور سے تھا۔ حادثے کے بعد ان کی میت آبائی علاقے پشاور روانہ کردی گئی۔

حادثے میں زخمی ہونے والے 14 سالہ لڑکے کی شناخت مون ولد میاں احسن چیلا، سکنہ واصو، کے نام سے بتائی گئی ہے۔ زخمی کو طبی امداد کے لیے ڈسٹرکٹ ہیڈکوارٹرز (ڈی ایچ کیو) ہسپتال جھنگ منتقل کیا گیا، جہاں سے لواحقین اسے مزید علاج کے لیے فیصل آباد لے گئے۔

واقعہ پیراگلائیڈر کی لینڈنگ کے دوران پیش آیا، تاہم آگ لگنے کی وجوہات فوری طور پر سامنے نہیں آسکیں۔