ڈپٹی کمشنر بابر صاحب دین کا تبادلہ کردیا گیا، نوٹفکیشن جاری

جھنگ :حکومتِ پنجاب نے ڈپٹی کمشنر جھنگ بابر صاحب دین کے تبادلے کا نوٹیفکیشن جاری کر دیا ہے۔ محکمہ سروسز اینڈ جنرل ایڈمنسٹریشن پنجاب کی جانب سے 25 اکتوبر 2026ء کو جاری کردہ نوٹیفکیشن کے مطابق بابر صاحب دین (پی اے ایس، بی ایس 18) کو فوری طور پر تبدیل کرتے ہوئے مزید احکامات کے لیے محکمہ سروسز اینڈ جنرل ایڈمنسٹریشن میں رپورٹ کرنے کی ہدایت کی گئی ہے۔ نوٹیفکیشن چیف سیکرٹری پنجاب زاہد اختر زمان کے حکم پر جاری کیا گیا ہے۔

یہ پیش رفت جھنگ جیپ ریلی کے دوران پیرا (پنجاب انفورسمنٹ اینڈ ریگولیٹری اتھارٹی) کی گاڑیوں کے ریلی میں شریک گاڑیوں کے ساتھ استعمال سے متعلق سامنے آنے والی ویڈیو کے بعد ہوئی ہے۔ وزیراعلیٰ پنجاب مریم نواز شریف نے 25 اکتوبر کو سماجی رابطے کی ویب سائٹ ایکس پر اس ویڈیو کے حوالے سے اپنا ردعمل جاری کیا۔

وزیراعلیٰ پنجاب نے اپنے بیان میں کہا کہ کسی ریگولیٹری ادارے کے وسائل کو اس کے مقررہ سرکاری فرائض سے ہٹ کر استعمال کرنا انتظامی نظم و ضبط کی خلاف ورزی اور حکومتی پالیسی کے منافی ہے۔ انہوں نے اس معاملے کو سرکاری وسائل کے استعمال اور انتظامی ذمہ داریوں کے تناظر میں اٹھایا۔

سرکاری نوٹیفکیشن میں ڈپٹی کمشنر بابر صاحب دین کے تبادلے کی وجوہات تفصیل سے بیان نہیں کی گئیں، تاہم یہ نوٹیفکیشن وزیراعلیٰ پنجاب کے مذکورہ بیان اور ویڈیو کے منظرِ عام پر آنے کے بعد جاری ہوا ہے۔ نوٹیفکیشن کے مطابق انہیں فوری طور پر متعلقہ محکمے میں رپورٹ کرنے کی ہدایت کی گئی ہے، جبکہ ان کے متبادل افسر کی تعیناتی سے متعلق تفصیلات جاری کردہ دستاویز میں شامل نہیں ہیں۔