پاکستان میں اپنی نوعیت کا پہلا تھیم پارک اسلام آباد میں تعمیر کیا جائے گا

سعودی عرب کے تعاون سے پاکستان کا اپنی نوعیت کا پہلا تھیم پارک اسلام آباد میں تعمیر کیا جائے گا۔

اس منصوبے کی مفاہمتی یادداشت پر آج قذافی اسٹیڈیم لاہور میں ایک شاندار تقریب کے دوران دستخط کیے گئے۔

سعودی پاکستان بزنس کونسل کے چیئرمین شہزادہ منصور بن محمد السعود اور وفاقی ترقیاتی ادارے کے چیئرمین سہیل اشرف نے مفاہمتی یادداشت پر دستخط کیے۔

وزیر داخلہ محسن نقوی اس موقع پر مہمان خصوصی تھے۔

سعودی مہمانوں کا پرتپاک خیرمقدم کرتے ہوئے محسن نقوی نے کہا کہ اسلام آباد کے بنیادی ڈھانچے کو دنیا کے جدید ترین شہروں کے معیار کے مطابق بنایا جا رہا ہے۔

انہوں نے کہا کہ آئندہ چند ماہ کے دوران سعودی عرب میں رئیل اسٹیٹ روڈ شو کا بھی منصوبہ بنایا گیا ہے۔

اس موقع پر شہزادہ منصور بن محمد السعود نے کہا کہ پاکستان، خصوصاً اسلام آباد میں سرمایہ کاری کے بہترین مواقع موجود ہیں۔