جھنگ میں تین ٹریفک حادثات میں 10 افراد زخمی، گھریلو تلخ کلامی پر بھائی کی فائرنگ سے 18 سالہ بہن بھی زخمی

جھنگ: ضلع جھنگ کے مختلف علاقوں میں ٹریفک حادثات اور فائرنگ کے واقعات میں بچوں سمیت 11 افراد زخمی ہو گئے۔ ریسکیو 1122 نے تمام زخمیوں کو ابتدائی طبی امداد فراہم کرنے کے بعد ہسپتال منتقل کر دیا۔

بھکر روڈ پر اڈہ ملکانہ موڑ کے قریب موٹرسائیکل کا ٹائر پھٹنے سے حادثہ پیش آیا جس کے نتیجے میں 40 سالہ محمد عرفان، ان کی 11 سالہ بیٹی رقیہ بی بی اور 9 سالہ بیٹے عبدالرحمان زخمی ہو گئے۔ تینوں کا تعلق کوٹلی باقر شاہ، تحصیل 18 ہزاری سے ہے۔ ریسکیو اہلکاروں نے زخمیوں کو ابتدائی طبی امداد فراہم کرنے کے بعد ٹی ایچ کیو ہسپتال 18 ہزاری منتقل کر دیا۔

دوسرا حادثہ فیصل آباد روڈ پر آر ایچ سی موچی والا کے قریب موٹر سائیکل رکشہ اور وین کے درمیان تصادم کے باعث پیش آیا جس میں پانچ افراد زخمی ہوئے۔ زخمیوں میں 8 سالہ جویریہ، 6 سالہ ردا فاطمہ، 10 سالہ راحیلہ، 8 سالہ ردا فاطمہ اور 18 سالہ عثمان شامل ہیں، جن کا تعلق چک نمبر 183 فیصل آباد روڈ جھنگ سے بتایا گیا ہے۔ ریسکیو ٹیم نے تمام زخمیوں کو ڈی ایچ کیو ہسپتال جھنگ منتقل کر دیا۔

ادھر شورکوٹ سے عبدالحکیم انٹرچینج کی جانب موٹروے M-4 پر تیز رفتار ویگو ڈالے کا ٹائر پھٹنے سے گاڑی الٹ گئی، جس کے نتیجے میں دو افراد زخمی ہوئے۔ اطلاع ملنے پر ریسکیو 1122 نے ایمبولینس روانہ کی، تاہم ایک زخمی کو موٹروے پولیس کی ایمبولینس کے ذریعے منتقل کیا جا رہا تھا جبکہ دوسرے زخمی کو ریسکیو اہلکاروں نے ابتدائی طبی امداد فراہم کی۔

دوسری جانب تحصیل احمد پور سیال کے علاقے پیر عبدالرحمان میں معمولی تلخ کلامی پر بھائی کی مبینہ فائرنگ سے 18 سالہ بہن اقصیٰ مائی دختر محمد اقبال زخمی ہو گئی۔ ریسکیو اہلکاروں نے موقع پر پہنچ کر زخمی لڑکی کو ابتدائی طبی امداد فراہم کی اور مزید علاج کے لیے ٹی ایچ کیو ہسپتال احمد پور سیال منتقل کر دیا۔