تعلیمی اداروں کو دور جدید کے تعلیمی تقاضوں سے ہم آہنگ کرنے کےلئے ٹھوس اقدامات کئے جا رہے ہیں۔ڈپٹی کمشنر

ڈپٹی کمشنر علی اکبر بھنڈر نے کہا ہے کہ تعلیمی اداروں کو دور جدید کے تعلیمی تقاضوں سے ہم آہنگ کرنے کےلئے ٹھوس اقدامات کئے جا رہے ہیں۔ ان خیالات کا اظہار انہوں نے محکمہ تعلیم کے افسران،گورنمنٹ سکولوں کے اساتذہ، طلباءاور سکول کونسل کے ممبران سے ملاقات کے دوران کیا۔ اس موقع پرڈپٹی کمشنر کو سکولوں میں بہتری اور تعلیمی معیار کو مزید بہتر کرنے کے حوالے سے بریفنگ دی گئی۔ ڈپٹی کمشنرکا کہنا تھا کہ وزیر اعلیٰ پنجاب مریم نواز شریف کی خصوصی ہدایات کی روشنی میں سکولوں کی مانیٹرنگ اور تعلیمی امور کی بہتری کیلئے منظم حکمت عملی پر عمل پیرا ہے۔ اس ضمن میں ایجوکیشن افسران سکولوں کا دورہ کرکے تدریسی و دیگر امور کی نگرانی کو یقینی بنائیں جبکہ سکولوں میں سہولیات کے حوالہ سے جائزہ لیکر رپورٹ پیش کی جائے۔ان کا مزید کہنا تھا کہ سکولوں میں معیاری تعلیم کے فروغ کو تسلسل سے جاری رکھنے کےلئے تمام میسر وسائل بروے کار لائے جا رہے ہیں۔دریں اثناءڈپٹی کمشنر علی اکبر بھنڈرنے بچوں کی جانب سے بنائے گئے ماڈلز کو سراہا۔