جھنگ میں دو مختلف واقعات، کرنٹ لگنے سے نوجوان سمیت جھگڑے میں دو افراد زخمی، تینوں کو ڈی ایچ کیو ہسپتال منتقل کر دیا گیا

جھنگ میں دو مختلف واقعات کے دوران ایک نوجوان کرنٹ لگنے جبکہ گھریلو تنازع پر ہونے والی لڑائی میں دو افراد زخمی ہوگئے، جنہیں ریسکیو 1122 نے فوری طبی امداد فراہم کرتے ہوئے ڈسٹرکٹ ہیڈکوارٹر (ڈی ایچ کیو) ہسپتال جھنگ منتقل کر دیا۔

ریسکیو 1122 کے مطابق پہلا واقعہ گوجرہ روڈ جھنگ کے چھٹے میل کے قریب پیش آیا، جہاں انٹرنیٹ کی وائر کی مرمت کے دوران 17 سالہ الیکٹریشن حارث ولد اعجاز بجلی کے کھمبے سے کرنٹ لگنے کے باعث زخمی ہوگیا۔ اطلاع ملتے ہی ریسکیو ٹیم موقع پر پہنچی اور متاثرہ نوجوان کو ابتدائی طبی امداد دینے کے بعد ڈی ایچ کیو ہسپتال منتقل کر دیا۔

دوسرا واقعہ محلہ غوثیہ، ڈاکٹر فاروق والی گلی میں پیش آیا، جہاں بچوں کے معمولی تنازع پر بڑوں کے درمیان جھگڑا ہوگیا، جس کے نتیجے میں 22 سالہ کامران ولد محمد ارشد اور 19 سالہ علی حسین ولد مظہر عباس زخمی ہوگئے۔ ریسکیو 1122 کی ٹیم نے فوری کارروائی کرتے ہوئے دونوں زخمیوں کو ابتدائی طبی امداد فراہم کی اور مزید علاج کے لیے ڈی ایچ کیو ہسپتال جھنگ منتقل کر دیا۔

ریسکیو ذرائع کے مطابق دونوں واقعات میں مجموعی طور پر تین افراد زخمی ہوئے، جبکہ متعلقہ ادارے مزید قانونی کارروائی اور تحقیقات میں مصروف ہیں۔