سابق ممبر صوبائی اسمبلی محمد یعقوب شیخ اور ڈپٹی کمشنر علی اکبر بھنڈر کی زیر صدارت ڈسٹرکٹ کوآرڈینیشن کمیٹی کا اہم اجلاس منعقد ہوا جس میں ضلع بھر میں جاری ترقیاتی منصوبوں، عوامی فلاحی اقدامات اور انتظامی امور کا تفصیلی جائزہ لیا گیا۔ اجلاس میں ڈی پی او ساجد حسین، سابق ایم پی اے فیصل حیات جبوآنہ، صاحبزادہ مولانا محمد آصف معاویہ، امیر عباس سیال، خالد غنی اور مختلف محکموں کے افسران نے شرکت کی۔

اجلاس کے دوران ترقیاتی اسکیموں پر پیشرفت، فنڈز کے استعمال اور جاری تعمیراتی سرگرمیوں کے حوالے سے متعلقہ افسران نے بریفنگ دی۔ ڈپٹی کمشنر علی اکبر بھنڈر نے ہدایت جاری کی کہ تمام منصوبوں میں شفافیت، اعلیٰ معیار اور بروقت تکمیل کو یقینی بنایا جائے تاکہ عوام کو بہتر سہولیات فراہم کی جا سکیں۔

اجلاس میں زیر تعمیر سڑکوں کے منصوبوں کا خصوصی جائزہ لیا گیا جبکہ متعلقہ حکام کو سختی سے ہدایت کی گئی کہ تعمیراتی میٹریل کے معیار پر کوئی سمجھوتہ نہ کیا جائے۔ ڈپٹی کمشنر نے واضح کیا کہ ناقص میٹریل یا غیر معیاری کام ہرگز برداشت نہیں کیا جائے گا اور تمام منصوبے مقررہ مدت میں مکمل کیے جائیں۔

بلڈنگ ڈیپارٹمنٹ نے زیر تعمیر سرکاری و عوامی عمارات سے متعلق بریفنگ دی جبکہ واسا حکام نے سیوریج بحالی منصوبوں، نکاسی آب کے مسائل اور شہری سہولیات کی بہتری کے اقدامات سے آگاہ کیا۔ اجلاس میں تمام متعلقہ اداروں کو عوامی مسائل کے فوری حل کیلئے دستیاب وسائل بروئے کار لانے کی ہدایت بھی کی گئی۔

اس موقع پر سابق ایم پی اے محمد یعقوب شیخ نے کہا کہ معرکہ حق کی شاندار فتح کا ایک سال مکمل ہونے پر ضلع بھر میں تقریبات اور جشن کا انعقاد کیا جائے گا تاکہ قومی یکجہتی اور جذبہ حب الوطنی کو فروغ دیا جا سکے۔ انہوں نے کہا کہ وزیر اعلیٰ پنجاب مریم نواز شریف کی ہدایات کے مطابق ضلعی انتظامیہ عوامی فلاح و بہبود اور تعمیر و ترقی کیلئے بھرپور اقدامات کر رہی ہے جن کے مثبت نتائج عوام تک پہنچ رہے ہیں۔