معمولی خاندانی تنازعے میں بہنوئی کے بھائی کا قتل، دونوں نامزد ملزمان گرفتار

تھانہ صدر کے علاقہ کڑیانوالہ میں پیش آنے والے اندوہناک قتل پر فوری کارروائی یقینی بناتے ہوئے پولیس نے نامزد دونوں ملزمان کو گرفتار کر لیا۔ واقعہ میں عامر شہزاد نامی شہری کو فائرنگ کر کے قتل کیا گیا تھا۔ابتدائی تفتیش کے مطابق ملزمان جعفر اقبال اور خضر اقبال نے مبینہ طور پر اپنی بہن کو تھپڑ مارنے کے واقعہ کا بدلہ لینے کی غرض سے اس سنگین جرم کا ارتکاب کیا۔ وقوعہ کے فوراً بعد پولیس نے جدید تفتیشی تقاضوں کو بروئے کار لاتے ہوئے ملزمان کو ٹریس کر کے گرفتار کر لیا۔ملزمان سے مزید تفتیش کا آغاز کر دیا گیا ہے، جبکہ شواہد کو مضبوط بنیادوں پر استوار کرتے ہوئے کیس کو منطقی انجام تک پہنچانے کیلئے تمام تر قانونی تقاضے پورے کئے جا رہے ہیں۔ڈی پی او جھنگ ساجد حسین نے واضح کیا ہے کہ خاندانی تنازعات کو خونریزی میں بدلنے والوں کے ساتھ آہنی ہاتھوں سے نمٹا جائے گا۔ انہوں نے مزید کہا کہ حقائق اور شواہد کی روشنی میں ملزمان کی سزایابی کو ہر صورت یقینی بنایا جائے گا اور کسی بھی مجرم کو قانون کی گرفت سے بچنے نہیں دیا جائے گا۔ڈی پی او نے عوام سے اپیل کی ہے کہ وہ قانون کو اپنے ہاتھ میں لینے سے گریز کریں اور تنازعات کے حل کیلئے قانونی راستہ اختیار کریں تاکہ معاشرے میں امن و امان برقرار رکھا جا سکے