چینی شہریوں کو کاروبار کے لئے تمام سہولیات فراہم کی جائیں گی،محسن نقوی

وزیر داخلہ محسن نقوی نے کہا ہے کہ پاکستان میں رہائش پذیر چینی باشندوں کی حفاظت کو حکومت اولین ترجیح دیتی ہے۔

ان خیالات کا اظہار انہوں نے آج لاہور میں چین کے قونصل جنرل ژاؤ شیران کی قیادت میں ملنے والے چین کے کاروباری وفد سے ملاقات میں کیا۔

ملاقات کے دوران چینی باشندوں اور منصوبوں پر کام کرنیوالے عملے کی حفاظت کیلئے کئے گئے اقدامات پر تفصیلی تبادلہ خیال کیا۔

وزیر داخلہ نے کہا کہ چینی شہریوں کو کاروبار کے لئے تمام سہولیات فراہم کی جائیں گی۔

انہوں نے کہا کہ چینی شہریوں کے تحفظ کے لئے سکیورٹی پلان کے لئے ایس او پیز ترتیب دیے ہیں۔

وزیر داخلہ نے کہا کہ پاکستان چودہ اگست سے چینی شہریوں کیلئے آن لائن ویزہ کی سہولت شروع کررہا ہے تاکہ چینی کاروباری افراد کو پاکستان آنے میں آسانی ہو۔

محسن نقوی نے چینی تاجروں کی تجاویز غور سے سنیں اور ان پر جلد پیشرفت کی یقین دہانی کرائی۔

اس موقع پر گفتگو کرتے ہوئے چین کے قونصل جنرل ژاؤ شیران نے کہا کہ پاکستان اور چین کے درمیان مثالی تعلقات ہیں۔