ڈنمارک کا پاکستان کے سمندری شعبے میں سرمایہ کاری بڑھانے میں دلچسپی کا اظہار

اسلام آباد: ڈنمارک نے پاکستان کے سمندری شعبے میں اپنی موجودگی بڑھانے میں گہری دلچسپی ظاہر کی ہے اور اس حوالے سے پائیدار اور جدید حل فراہم کرنے کے عزم کا اعادہ کیا ہے۔

یہ عزم پاکستان میں ڈنمارک کے سفیر جیکب لینولف نے آج وفاقی وزیر برائے بحری امور، محمد جنید انور چوہدری سے ملاقات کے دوران ظاہر کیا۔

ملاقات میں پاکستان کے سمندری شعبے میں ڈنمارک کی سرمایہ کاری میں پیش رفت کا جائزہ لیا گیا اور گزشتہ سال دونوں ممالک کے درمیان طے پانے والے مفاہمتی یادداشت (ایم او یو) کے تحت دو ارب ڈالر کی سرمایہ کاری کے منصوبے پر عمل درآمد پر تبادلہ خیال کیا گیا۔

یہ سرمایہ کاری پاکستان کے سمندری بنیادی ڈھانچے کو جدید بنانے، بندرگاہوں کی کارکردگی کو بہتر بنانے اور شپنگ اور لاجسٹکس کے شعبے میں پائیدار طریقوں کو فروغ دینے کے لیے کی جا رہی ہے۔