ڈپٹی کمشنر،ڈی پی او کا پاک آرمی کے افسران کے ہمراہ محرم الحرام کے مرکزی جلوس کے روٹس کا دورہ، سیکیورٹی انتظامات کا تفصیلی جائزہ لیا

ڈی پی او کیپٹن (ر) بلال افتخار کیانی نے ڈپٹی کمشنر علی اکبر بھنڈر اور پاک آرمی کے افسران کے ہمراہ تھانہ محرم الحرام کے حوالے سے تھانہ سٹی کے مرکزی جلوس کے روٹس کا دورہ کیا۔ اس موقع پر سیکیورٹی کے حوالے سے انتظامات کا تفصیلی جائزہ لیا گیا۔دورے کے دوران ممبرانِ امن کمیٹی، لائسنس داران جلوس و مجالس منتظمین اور دیگر متعلقہ حکام بھی موجود تھے۔ انچارج سیکیورٹی نے ڈی پی او کو محرم الحرام کے لیے ترتیب دئیے گئے سکیورٹی پلان پر تفصیلی بریفنگ دی۔ ڈی پی او بلال افتخار کیانی نے سیکیورٹی انتظامات پر اطمینان کا اظہار کرتے ہوئے کہا کہ تمام ادارے مربوط حکمتِ عملی کے تحت فرائض سرانجام دے رہے ہیں۔ڈی پی او نے واضح کیا کہ سکیورٹی پلان پر مکمل اور مؤثر عملدرآمد کو ہر صورت یقینی بنایا جائے گا، اور قانون و ضابطہ اخلاق کی مکمل پاسداری کی جائے گی۔ انہوں نے کہا کہ عوام کے جان و مال کا تحفظ اولین ترجیح ہے، اور کسی بھی شرپسند یا ملک دشمن عناصر کو امن خراب کرنے کی اجازت نہیں دی جائے گی، ایسے عناصر سے آہنی ہاتھوں سے نمٹا جائے گا۔ڈی پی او بلال افتخار کیانی نے تمام اسٹیک ہولڈرز سے تعاون کی اپیل کرتے ہوئے کہا کہ محرم الحرام کے دوران بین المذاہب ہم آہنگی، بھائی چارے اور صبر و تحمل کا مظاہرہ وقت کی ضرورت ہے۔