افغان باشندوں کے رجسٹریشن کارڈ کی مدت میں ایک سال کی توسیع کی ہے،امیرمقام

ریاستوں اور سرحدی علاقوں کے وزیر امیر مقام نے افغانستان کے ساتھ پاکستان کی پائیدار دوستی اور تعاون خاص طور پر افغان پناہ گزینوں کے تحفظات دور کرنے پر زور دیا ہے۔افغانستان کے ناظم الامور سردار احمد خان شکیب سے اسلام آباد میں گفتگو کرتے ہوئے وفاقی وزیر نے دونوں ہمسایہ ملکوں کے درمیان دوطرفہ تعلقات کو مضبوط بنانے پر زور دیا۔امیر مقام نے کہا کہ حکومت نے افغانستان کی موجودہ صورتحال کاادراک کرتے ہوئے پاکستان میں مقیم افغان باشندوں کے رجسٹریشن کارڈ کی مدت میں ایک سال کی توسیع کی ہے۔انہوں نے افغانستان پر زور دیا کہ وہ پاکستان میں رہائش پذیر اپنے شہریوں کیلئے طویل مدتی حل پر عملدرآمد کرے۔افغان ناظم الامور نے افغان پناہ گزینوں کے رجسٹریشن کارڈ کی مدت میں توسیع کے اقدام کو سراہا اور اسے پاکستان میں مقیم افغان باشندوں کی بڑی حمایت قرار دیا۔