اسمگلنگ و ذخیرہ اندوزی کےخلاف مہم انتہائی کامیاب رہی،وزیر داخلہ

نگران وزیرداخلہ سرفراز احمد بگٹی نے کہا ہے کہ حکومت کی انسداد اسمگلنگ اور ذخیرہ اندوزی کی کامیاب مہم کے نتیجے میں ہزاروں میٹرک ٹن گندم، چینی، یوریا کھاد اور پیٹرولیم مصنوعات برآمد ہوئی ہیں۔

انہوں نے آج سہ پہر اسلام آباد میں نگران وزیر اطلاعات و نشریات مرتضیٰ سولنگی کے ساتھ ایک مشترکہ نیوز کانفرنس کی تفصیلات بتاتے ہوئے کہا کہ گزشتہ ایک ماہ کے دوران تقریباً بائیس ہزار دوسو میٹرک ٹن گندم، اٹھاسی ہزار میٹرک ٹن چینی، تینتالیس سو میٹرک ٹن یوریا کھاد اور ایک ہزار ایک سو پچانوے میٹرک ٹن کی پیٹرولیم مصنوعات برآمد ہو چکی ہیں۔

وزیر داخلہ نے انسداد منشیات مہم کے بارے میں کہا کہ تینتالیس میٹرک ٹن منشیات قبضے میں لی گئیں اور دوسو مقدمات درج کئے گئے۔

سرفراز بگٹی نے ڈالرز کی اسمگلنگ اور رقوم کے غیرقانونی تبادلے کے خلاف مہم میں کامیابی کے بارے میں کہا کہ اس غیرقانونی سرگرمی میں ملوث افراد کیخلاف ایک سو اڑسٹھ ایف آئی آر درج کی گئی ہیں۔وزیر داخلہ نے ایک سوال کے جواب میں کہا کہ بری فوج کے سربراہ نے اپنے فوجی اہلکاروں کو واضح ہدایات دی ہیں کہ اگر کوئی سمگلنگ میں ملوث پایا گیا تو اس کا کورٹ مارشل کیا جائے گا اور اسے جیل بھی بھیجا جائے گا۔