پاکستان کشمیری عوام کی حق خودارادیت کی حمایت جاری رکھے گا، عطاء اللہ تارڑ

وزیر اطلاعات و نشریات عطاء اللہ تارڑ نے کہا ہے کہ پاکستان بھارت کے غیر قانونی قبضہ جموں و کشمیر کے لوگوں کی ان کے حق خودارادیت کے حصول کیلئے جاری جدوجہد میں حمایت جاری رکھے گا۔

پاکستانی سفارت خانے کی طرف سے برلن میں یوم استحصال کشمیر کے حوالے سے ایک ویب نار سے خطاب کرتے ہوئے انہوں نے کہا کہ بھارت کے غیر قانونی زیر قبضہ جموں و کشمیر کے عوام بے پناہ قربانیاں دے رہے ہیں۔

بھارت کے پانچ اگست دو ہزار اُنیس کے یکطرفہ اقدام کا حوالہ دیتے ہوئے وزیر اطلاعات نے کہا کہ اس اقدام کا مقصد کشمیریوں کو بے اختیار بنانا، انہیں ووٹ کے حق سے محروم کرنا اور اپنی ہی زمین سے بے دخل کرنا تھا۔

وزیر اطلاعات نے کہا کہ بھارت کا علاقے پر ظالمانہ قبضہ نہ صرف بین الاقوامی قوانین کی خلاف ورزی بلکہ بین الاقوامی طور پر تسلیم شدہ انسانی حقوق کا مذاق اڑانے کے مترادف ہے۔

وزیر اطلاعات نے کہا کہ پاکستان کشمیری عوام کیلئے اس وقت تک آواز اٹھاتا رہے گا جب تک عالمی برادری کی طرف سے اس مسئلے پر کوئی کارروائی نہیں کی جاتی۔