اسپیکر قومی اسمبلی سردار ایاز صادق مذاکرات کے لیے تیار

سپیکر قومی اسمبلی سردار ایاز صادق نے حکومت اور اپوزیشن کے درمیان سیاسی معاملات سمیت تمام امور پر مذاکرات کے لیے کردار ادا کرنے کی آمادگی ظاہر کی ہے۔

ایک ویڈیو پیغام میں انہوں نے کہا کہ ان کا دفتر اور رہائش گاہ حکومت اور اپوزیشن کے لیے ہر وقت کھلی ہیں، اور دونوں فریق ملکی مفاد میں تلخی کم کرنے اور بات چیت کے لیے آسکتے ہیں۔

انہوں نے کہا کہ کئی اہم مسائل جیسے کہ ماحولیاتی تبدیلی اور صوبائی خودمختاری پر تبادلہ خیال کی ضرورت ہے۔

سردار ایاز صادق نے گزشتہ روز رکن قومی اسمبلی شیر افضل مروت، وزیر دفاع خواجہ آصف اور وزیراعظم کے مشیر رانا ثناءاللہ کی تقاریر کا ذکر کرتے ہوئے کہا کہ ان کا دفتر اور رہائش گاہ اراکین کے لیے ہمیشہ کھلے رہتے ہیں، اور وہ حکومت اور اپوزیشن دونوں کے لیے یکساں احترام رکھتے ہیں۔