اقوام متحدہ افغان مہاجرین کے مسئلے کے پائیدارحل کیلئے کرداراداکرے،وزیراعظم

وزیراعظم محمد شہباز شریف نے پناہ گزینوں کے بارے میں اقوام متحدہ کے ادارے پر زور دیا ہے کہ وہ افغان مہاجرین کے مسئلہ کے پائیدار حل کے فروغ کے لئے اپنا کردار ادا کرے۔

اسلام آباد میں آج(منگل) پناہ گزینوں کے بارے میں اقوام متحدہ کے ہائی کمشنرفلیپوگرانڈی سے گفتگو کرتے ہوئے انہوں نے کہا کہ بین الاقوامی برادری پاکستان کی اتنی بڑی تعداد میں مہاجرین کی میزبانی کوسمجھے اور اجتماعی ذمہ داری کا مظاہرہ کرے۔

انہوں نے کہا کہ یواین ایچ سی آر اس حوالے سے پاکستان کی کوششوں میں مدد فراہم کرنے کیلئے خاطرخواہ وسائل کومتحرک کرے۔

وزیر اعظم نے کمزور افراد کے تحفظ کے لئے پاکستان کے عزم کا اظہار کرتے ہوئے بین الاقوامی برادری سے کہا کہ وہ پاکستان کواس حوالے سے درپیش معاشی و معاشرتی مسائل اور خطرات سے خبردار رہے۔

اقوام متحدہ کے ہائی کمشنر نے افغان مہاجرین کی تمام بنیادی ضروریات پوری کرنے کے لئے پاکستان کے ساتھ مل کر کام جاری رکھنے کی یقین دہانی کرائی۔