صدر آصف علی زرداری نے کہا ہے کہ پوری قوم دہشت گردی کے خاتمے اور ملک میں پائیدار امن یقینی بنانے کیلئے سکیورٹی فورسز کے شانہ بشانہ کھڑی ہے۔

انہوں نے یہ بات وزیر داخلہ محسن نقوی سے گفتگو کرتے ہوئے کہی جنہوں نے کراچی میں ان سے ملاقات کی۔

دونوں رہنمائوں نے ملک میں امن و امان کی مجموعی صورتحال پر تفصیلی تبادلہ خیال کیا جس میں خیبرپختونخوا اور بلوچستان کی سکیورٹی صورتحال پر خصوصی توجہ دی گئی۔

صدر آصف علی زرداری نے دہشت گردی کے خلاف جنگ میں مسلح افواج، قانون نافذ کرنے والے اداروں اور پولیس کی بہادری، پیشہ ورانہ مہارت اور قربانیوں کو خراجِ عقیدت پیش کیا۔

ملاقات میں ملک کی موجودہ سیاسی صورتحال ، باہمی دلچسپی کے اُمور اور دیگر اہم قومی اُمور پر بھی بات چیت کی گئی۔