وزیراعظم کی وفاقی اداروں کو قومی ڈیٹا سینٹر “اسکائی 47” سے فوری منسلک کرنے کی ہدایت

وزیراعظم محمد شہباز شریف نے ڈیجیٹل نظم و نسق مضبوط بنانے کے لیے وفاقی اداروں کو حال ہی میں قائم کیے گئے قومی ڈیٹا سینٹر سکائی 47 سے فوری طور پر منسلک کرنے کی ہدایت کی ہے۔

وہ آج اسلام آباد میں نیشنل ڈیجیٹل پالیسی فریم ورک پرعملدرآمد کے حوالے سے جائزہ اجلاس کی صدارت کر رہے تھے۔

انہوں نے کہا پاکستان ڈیجیٹل اتھارٹی  ڈیجیٹل نظم ونسق اور عوامی خدمات کی فراہمی کے لیے ایک متحرک اور انقلابی سمت فراہم کر رہی ہے۔

انہوں نے نیشنل ڈیجیٹل ویژن کے تین ستونوں ڈیجیٹل معیشت، ڈیجیٹل عوامی خدمات اور ڈیجیٹل حکومتی خدمات کے تحت ہونے والی پیش رفت کو سراہا۔

شہباز شریف نے ہدایت کی کہ بہتر عوامی خدمات کی جلد فراہمی یقینی بنانے کے لیے صحت، زراعت، روز مرہ کی بنیادی سہولیات، ہاؤسنگ اور چھوٹے و درمیانے درجے کے کاروبار کے شعبوں میں ‘نیشنل ڈیجیٹل ویژن’ کا نفاذ ترجیحی بنیادوں پر کیا جائے۔