پنجاب میں تمام سرکاری اور نجی سکول آشوب چشم کے واقعات بڑھنے کے تناظر میں اتوارتک بند رہینگے

پنجاب کے سکولوں کی تعلیم کے محکمے نے آشوب چشم کی وبا کے بڑھتے ہوئے مریضوں کے

پیش نظر صوبے کے تمام سرکاری اور نجی سکول اتوار تک بند رکھنے کا اعلان کیا ہے۔

یہ فیصلہ بچوں کو آشوب چشم کی وبا سے محفوظ رکھنے کیلئے کیا گیا ہے۔

اعلامیے کے مطابق تمام سکول پیر سے دوبارہ کھلیں گے اور اس وبا سے بچنے کیلئے سکولوں کی تعلیم نے محکمے کی جانب سے جاری کی گئی حفاظتی تدابیر پر عمل کیا جائے گا۔

دریں اثنا آشوب چشم پھیلنے پر ماہرین نے کہا ہے کہ آشوب چشم میں مبتلا افراد سیاہ چشمے پہنیں، مصافحہ کرنے سے گریز کریں اور فوری طور پر اپنا بستر اور برتن الگ کر لیں۔

انفیکشن کے بڑھتے ہوئے کیس عکاسی کر رہے ہیں کہ یہ بیماری ہر عمر کے افراد کو متاثر کر رہی ہے۔

سکول جانے والے بچوں کی بڑی تعداد کو آنکھوں میں جلن کی شکایت ہے کیونکہ سکول میں ابتدائی طور پر احتیاطی تدابیر اختیار نہیں کی جا رہی ہیں۔

طبی ماہرین کا کہنا ہے کہ یہ مرض گنجان آباد جگہوںمثلاً کارخانوں، بازاروں، مارکیٹوں اور شاپنگ پلازوں میں تیزی سے پھیل رہا ہے جہاں لوگوں کو ناسازگار ماحول کا سامنا رہتا ہے۔

آشوب چشم ایک عام اور متعدی بیماری ہے جو پلکوں اور آنکھوں کے دیدے کو متاثر کرتی ہے۔تاہم یہ انفیکشن قابل علاج ہے اور متاثرہ افراد کو فوری طور پر ڈاکٹر سے رجوع کرنا چاہئے۔