چولستان کینال منصوبہ دریائے سندھ پر نہیں بلکہ دریائے ستلج پر بنایا جائے گا، وزیر آبی وسائل

اسلام آباد: وزیر برائے آبی وسائل، مصدق مسعود ملک نے واضح کیا ہے کہ چولستان کینال منصوبہ دریائے سندھ پر نہیں بلکہ دریائے ستلج پر تعمیر کیا جائے گا۔ انہوں نے اس بات پر زور دیا کہ ہر صوبے کو اپنے طے شدہ پانی کے حصے کو اپنی ضروریات کے مطابق استعمال کرنے کا مکمل حق حاصل ہے۔

آج سینیٹ میں شیری رحمان کی جانب سے پیش کی گئی تحریک التوا پر بحث سمیٹتے ہوئے مصدق مسعود ملک نے کہا کہ چولستان کینال منصوبہ پنجاب حکومت کا منصوبہ ہے، جس کا 225 ارب روپے مالیت کا پی سی-1 سینٹرل ڈویلپمنٹ ورکنگ پارٹی نے منظور کر لیا ہے۔ اس سے قبل انڈس ریور سسٹم اتھارٹی (IRSA) نے اس منصوبے کے لیے پانی کا سرٹیفکیٹ جاری کیا تھا۔

وزیر آبی وسائل نے آبی معاہدے کا حوالہ دیتے ہوئے کہا کہ کسی بھی صوبے پر یہ پابندی عائد نہیں کہ وہ اپنے مختص شدہ پانی کے حصے میں نئے منصوبے نہ بنا سکے۔

انہوں نے مزید کہا کہ وفاقی حکومت نے ایک ٹیلی میٹری سسٹم متعارف کرانے کا منصوبہ بنایا ہے، جو پانی کے بہاؤ کی نگرانی کے عمل کو خودکار بنا دے گا، تاکہ پانی کی تقسیم کو مزید شفاف اور مؤثر بنایا جا سکے۔