وزیر اعظم محمد شہباز شریف نے کہا ہے کہ ہم پاکستان آنے والے سکھ برادری کے افراد کو ہر ممکن سہولیات فراہم کرنے کے لئے کوشاں ہیں۔

وہ امریکہ میں مقیم سکھ برادری کی تنظیم کے صدر جسدیپ سنگھ سے گفتگو کر رہے تھے جنہوں نے آج(منگل) کو اسلام آباد میں ان سے ملاقات کی۔

وزیراعظم نے کہا کہ پاکستان میں سکھوں کے بہت سے مقدس مذہبی مقامات موجود ہیں جہاں پر دنیا بھر سے سکھ برادری کے افراد مذہبی رسومات کی ادائیگی کے لئے آتے ہیں۔

انہوں نے کہا کہ اس سلسلے میں انہیں سہولت فراہم کرنا ہمارے لیے اعزاز کی بات ہے۔انہوں نے کہا کہ ہم پاکستان میں مقیم سکھ برادری کی فلاح و بہبود اور دنیا بھر سے سکھ یاتریوں کو مزید سہولیات کی فراہمی کے حوالے سے حکمت عملی ترتیب دیں گے۔

سمندر پار پاکستانیوں کا ذکر کرتے ہوئے وزیر اعظم نے کہا کہ بیرون ملک پاکستانی ملک کی ترقی و خوشحالی کے حوالے سے اہم کردار ادا کر رہے ہیں۔

اس موقع پر جسدیپ سنگھ نے پاکستان میں ان کی میزبانی اور سکھ یاتریوں کی مہمان نوازی پر وزیر اعظم اور حکومت پاکستان کا شکریہ ادا کیا۔ملاقات میں وفاقی وزیر قانون و انصاف اعظم نذیر تارڑ اور پاکستانی نژاد امریکی کاروباری شخصیت ساجد تارڑ بھی موجود تھے۔