بلوچستان میں سکیورٹی فورسز کی دو کارروائیاں، فتنہ الہندوستان سے تعلق رکھنے والے بارہ دہشت گرد ہلاک

سکیورٹی فورسز نے بلوچستان کے اضلاع واشک اور مستونگ میں خفیہ اطلاعات پر مبنی دو کارروائیوں کے دوران فتنہ الہندوستان سے تعلق رکھنے والے بارہ دہشت گرد ہلاک کر دیے ہیں۔

فوج کے شعبہ تعلقات عامہ کے مطابق گزشتہ روز بلوچستان کے ضلع واشک میں سکیورٹی فورسز نے چھ دہشت گردوں کی نقل و حرکت کا سراغ لگایا اس کے بعد انتہائی موثر کارروائی کرتے ہوئے بھارتی سرپرستی میں کام کرنے والے فتنہ الہندوستان کے تمام چھ دہشت گردوں کو ہلاک کر دیا گیا۔

آج ضلع مستونگ میں خفیہ اطلاعات پر مبنی ایک اور کارروائی میں سکیورٹی فورسز اور دہشت گردوں کے درمیان شدید فائرنگ کے تبادلے میں مزید چھ دہشت گرد ہلاک کر دیے گئے۔ اس دوران دہشت گردوں کا ٹھکانہ بھی تباہ کر دیا گیا۔

یہ کارروائیاں بھارتی سرپرستی میں کام کرنے والے عناصر کے خاتمے کے لیے جاری انسدادِ دہشت گردی مہم ”ردالفتنہ ۔ تین” کے تحت کی گئیں۔