کشمیری برادری کا مقبوضہ جموں و کشمیر کے عوام سے اظہارِ یکجہتی

امریکہ میں مقیم کشمیری برادری نے نیویارک میں اقوام متحدہ کے ہیڈکوارٹرز کے باہر بھارت کے غیرقانونی زیرقبضہ جموں و کشمیر کے عوام سے اظہارِ یکجہتی کے لیے احتجاجی مظاہرہ کیا۔

احتجاجی مظاہرے کا اہتمام کشمیر کے بارے میں عالمی آگاہی فورم اور نیویارک اور واشنگٹن میں مقیم کشمیری برادری نے کیا۔

مظاہرین نے بھارتی نمائندے کو اقوام متحدہ سے خطاب کی اجازت دینے پر مایوسی کا اظہار کیا اور عالمی ادارے سے مطالبہ کیا کہ کشمیری عوام کو حق خودارادیت دیا جائے۔

انہوں نے مقبوضہ جموں و کشمیر میں انسانی حقوق کی خلاف ورزیوں کے خاتمے اور اقوام متحدہ کی قراردادوں پر فوری عمل درآمد کا بھی مطالبہ کیا۔

مظاہرین نے اقوام متحدہ کے حکام کو ایک یادداشت بھی پیش کی جس میں مسئلہ کشمیر کے پرامن اور منصفانہ حل کے لیے سفارتی مداخلت پر زور دیا گیا۔