غیرقانونی سرگرمیوں کیخلاف کارروائیاں جاری رکھیں گے،آرمی چیف

بری فوج کے سربراہ جنرل سید عاصم منیر نے کہا ہے کہ قانون نافذ کرنے والے ادارے اور دوسرے سرکاری محکمے پوری قوت سے غیر قانونی سرگرمیوں کے خلاف کارروائیاں جاری رکھیں گے تاکہ ان سرگرمیوں کے نتیجے میں وسائل کی چوری اور اقتصادی نقصانات کو روکا جاسکے۔

انہوں نے یہ بات کراچی میں صوبائی ایپکس کمیٹی کے اجلاس میں گفتگو کرتے ہوئے کہی۔

اجلاس کے دوران آرمی چیف کو نظرثانی شدہ ایکشن پلان، سندھ میں کچے کے علاقے میں آپریشن، چین پاکستان اقتصادی راہداری اور دوسرے منصوبوں میں کام کرنے والے غیر ملکیوں کی سلامتی، غیر قانونی طور پر مقیم غیر ملکیوں کی واپسی، بیرونی کرنسی کی قدر کو معمول پر لانے کے اقدامات، کراچی کی بہتری کے منصوبے، سندھ میں خصوصی سرمایہ کاری سہولت کونسل کے منصوبوں اور گرین سندھ اقدامات کے بارے میں بریفنگ دی گئی۔

آرمی چیف نے ان اہم اقدامات سے فوائد حاصل کرنے کیلئے تمام متعلقہ محکموں میں ہم آہنگی کی ضرورت پر زور دیا۔اجلاس میں عزم ظاہر کیا گیا کہ ریاستی ادارے، حکومتی محکمے اور عوام صوبے کی ترقی اور خوشحالی کیلئے متحد ہیں۔