صدر کا دولت مشترکہ کے ساتھ مضبوط تعاون پر زور

صدر آصف علی زرداری نے موسمیاتی تبدیلی، تعلیم، پارلیمانی وفود کے تبادلوں کے شعبوں اور قدرتی آفات سے نمٹنے کی تیاریوں میں دولت مشترکہ کے ساتھ مضبوط تر تعاون کی ضرورت پر زور دیا ہے۔

وہ آج اسلام آباد میں دولت مشترکہ کی سیکرٹری جنرل پیٹریسیا سکاٹ لینڈ کی قیادت میں ایک وفد سے باتیں کررہے تھے۔

صدر نے دولت مشترکہ کے رکن ممالک کے ساتھ دوستانہ تعلقات کومزید مضبوط بنانے کے لئے پارلیمانی اداروں کے درمیان روابط میں اضافے پر زور دیا۔

وفد کاخیر مقدم کرتے ہوئے صدر نے کہا کہ پاکستان رکن ممالک کے درمیان تعاون کے فروغ کے لئے اس تنظیم کو انتہائی اہمیت دیتا ہے۔

ملاقات میں پاکستان پر موسمیاتی تبدیلی کے اثرات کے بارے میں تبادلہ خیال کیا گیا۔

سیکرٹری جنرل پیٹریسیا سکاٹ لینڈنے پاکستان کے ساتھ دولت مشترکہ کے مضبوط روابط کو اُجاگر کیا اور تنظیم کے کام کے لئے پاکستان کی مسلسل حمایت پر شکریہ ادا کیا۔