صدرمملکت، وزیراعظم کی ڈونلڈ ٹرمپ پر قاتلانہ حملے کی مذمت

صدر آصف علی زرداری اور وزیراعظم محمد شہبازشریف نے سابق امریکی صدر ڈونلڈ ٹرمپ پر پنسلوینیا میں انتخابی ریلی کے دوران حملے کی شدید مذمت کی ہے ۔

صدر زرداری نے حملے پر گہرے دکھ کا اظہار کرتے ہوئے کہاکہ سیاست میں ایسے تشدد کی کوئی گنجائش نہیں ۔

صدر نے ڈونلڈ ٹرمپ کی جلد صحت یابی کیلئے نیک خواہشات کااظہارکیا اور حملے میں جانی نقصان پر دلی تعزیت کی ۔

وزیراعظم نے ایکس پراپنے پیغام میں حادثے کو افسوسناک قراردیا۔

سیاست میں ہرقسم کے تشدد کی مذمت کرتے ہوئے وزیراعظم نے ڈونلڈ ٹرمپ کی تیزی سے صحت یابی اور اچھی صحت کیلئے دعا کی ۔

قومی اسمبلی کے سپیکر ایاز صادق نے بھی پنسلوینیا میں سابق امریکی صدر ڈونلڈ ٹرمپ کی انتخابی ریلی پرحملے کی شدید مذمت کی ہے۔

انہوں نے حملے میں زخمی ہونے والوں کی جلد صحت یابی کی دعا کی ہے۔