پاکستان کاافغانستان میں زلزلہ سے قیمتی انسانی جانوں کے ضیاع پراظہارافسوس

پاکستان نے گزشتہ روز افغانستان کے مغربی علاقوں میں تباہ کن زلزلے میں قیمتی جانوں اور املاک کے نقصان پر گہرے دکھ اور افسوس کااظہارکیا ہے ۔

آج(اتوار) دفترخارجہ کی ترجمان کی طرف سے جاری ایک بیان میں کہاگیا کہ پاکستان کی حکومت اورعوام گزشتہ روز افغانستان کے مغربی علاقوں میں آنے والے ہولناک زلزلے پر بے حد رنجیدہ ہیں جس کے نتیجے میں قیمتی انسانی جانیں ضائع ہوئیں اور بڑے پیمانے پر املاک کو نقصان پہنچا۔

بیان میں کہاگیا کہ ہم اس سانحے میں اپنے پیاروں کو کھونے والے خاندانوں سے دلی تعزیت کرتے ہیں اور زخمیوں کی جلداورمکمل صحت یابی کیلئے دعا گو ہیں۔

بیان میں مزید کہاگیا ہے کہ پاکستان اس مشکل گھڑی میں افغان بہن بھائیوں کے ساتھ مکمل یکجہتی کا اظہارکرتا ہے۔

 ادھر طالبان کے سینئر رہنما سہیل شاہین نے کہا ہے کہ مغربی افغانستان میں شدید زلزلے کے باعث ہلاک ہونیو الوں کی تعداد2ہزار ہوسکتی ہے۔

انہوں نے کہاکہ ہلاکتوں کی تعداد بڑھ سکتی ہے کیونکہ متعدد افراد لاپتہ ہیں اور ملبے تلے دبے افراد کو بچانے کیلئے امدادی کارروائیاں جاری ہیں۔