وزیر مواصلات کا ملک میں موٹرویز کی تعمیر کیلئے حکومت کی ترجیحات کا اعادہ

مواصلات کے وزیر عبدالعلیم خان نے کہا ہے کہ دہشت گردی اور ملک دشمن سرگرمیوں میں ملوث عناصر کا خاتمہ ملک کی ترقی اور خوشحالی کیلئے ناگزیر ہے۔

انہوں نے ان خیالات کا اظہار خیبر پختونخوا سے تعلق رکھنے والے استحکام پاکستان پارٹی کے سینئر رہنما جی جی جمال سے آج اسلام آباد میں ملاقات کے دوران کیا۔

وفاقی وزیر نے کہا کہ ہر محب وطن وسیع تر قومی مفاد میں عزم استحکام آپریشن کی مکمل حمایت کریگا۔

انہوں نے کہا کہ امن و امان کی بہتر صورتحال سرمایہ کاری اور ترقی کیلئے بہت ضروری ہے اور ملکی ادارے اس سلسلے میں اپنی ذمہ داریاں پوری کر رہے ہیں۔

انہوں نے خیبرپختونخوا کی تزویراتی اہمیت کو اجاگر کرتے ہوئے اسے چین، افغانستان اور وسطی ایشیا کیلئے ایک گزرگاہ قرار دیا اور خطے میں بین الصوبائی شاہراہوں اور موٹرویز کی تعمیر کیلئے حکومت کی ترجیحات کا اعادہ کیا۔