پاکستان میں کاروباری رجسٹریشن میں نمایاں اضافہ، ایس ای سی پی نے نیا ریکارڈ قائم کر دیا

اسپیشل انویسٹمنٹ فیسلیٹیشن کونسل (SIFC) ملک میں کاروباری ماحول کو معاون اور سازگار بنانے کے لیے سرگرم عمل ہے تاکہ نئی کمپنیوں کی رجسٹریشن کو فروغ دیا جا سکے۔

اسی سلسلے میں سیکیورٹیز اینڈ ایکسچینج کمیشن آف پاکستان (SECP) نے جنوری 2025 میں ایک نیا ریکارڈ قائم کیا، جس کے تحت تین ہزار چار سو سے زائد نئی کمپنیاں رجسٹرڈ کی گئیں۔ یہ تعداد گزشتہ سال کے ماہانہ اوسط کے مقابلے میں انتالیس فیصد زیادہ ہے، جو کہ پاکستان کے کاروباری شعبے میں مثبت پیش رفت کی علامت ہے۔

نئی رجسٹریشن میں نمایاں شعبے انفارمیشن ٹیکنالوجی اور ای کامرس رہے، جن میں چھ سو باون کمپنیاں رجسٹرڈ ہوئیں، جبکہ چار سو تریسٹھ کمپنیاں ٹریڈنگ، چار سو گیارہ سروسز، اور تین سو گیارہ رئیل اسٹیٹ و کنسٹرکشن کے شعبے میں رجسٹرڈ کی گئیں۔ اس کے علاوہ، سیاحت، ٹرانسپورٹ، خوراک و مشروبات اور صحت کے شعبوں میں بھی نئی کمپنیوں کے قیام میں بتدریج اضافہ دیکھنے میں آیا ہے۔

یہ پیش رفت ملکی معیشت کے استحکام اور کاروباری سرگرمیوں میں تیزی کی عکاسی کرتی ہے۔