دفترخارجہ کے ترجمان طاہر اندرابی نے کہا ہے کہ سیکورٹی صورتحال کی بہتری تک افغان ٹرانزٹ ٹریڈ بند رہے گی۔

اسلام آباد میں ہفتہ وار نیوز بریفنگ کے دوران ایک سوال کے جواب میں انہوں نے کہا کہ ان تجارتی مراکز پر افغانستان کی جانب سے مسلسل حملے کیے گئے جن میں بے گناہ پاکستانی شہید ہوئے۔

انہوں نے کہا کہ پاکستانیوں کی زندگی کسی بھی طرح کی تجارت سے زیادہ اہم ہے۔

ترجمان نے کہا کہ افغان سرزمین پاکستان میں دہشت گردی پھیلانے اوراس میں معاونت کیلئے استعمال نہیں ہونی چاہئیے۔

ترجمان نے کہا کہ پاکستان کی جانب سے افغان عبوری حکومت کیلئے پیغام ہے کہ ان حملوں کو روکیں، ٹی ٹی پی اور دیگر مسلح گروہوں کے جرائم پیشہ افراد اور شدت پسند دہشت گردوں کو قابو اور گرفتار کریں۔

بھارت کی جانب سے آزاد کشمیر کا زبردستی الحاق کرنے کے حوالے سے کسی بھی خطرے کے بارے میں سوال کا جواب دیتے ہوئے ترجمان نے کہا کہ پاکستان نے ایسے کسی بھی حملے کو ناکام بنانے کیلئے دفاعی تیاری کر رکھی ہے۔

شرم الشیخ معاہدے کے بارے میں ایک سوال کے جواب میں ترجمان نے کہا کہ وقت آگیا ہے کہ اس معاہدے کو پائیدار امن عمل میں تبدیل کیا جائے جس کے نتیجے میں فلسطینی ریاست قائم ہو جس کا دارالحکومت القدس الشریف ہو۔