شزہ فاطمہ کا ورچوئل دنیا میں بچوں کے تحفظ کو یقینی بنانے پر زور

انفارمیشن ٹیکنالوجی کی وزیر شزہ فاطمہ خواجہ نے اس ضرورت پر زور دیا ہے کہ بچوں کو جدید ڈیجیٹل آلات اور ٹیکنالوجی تک رسائی سے محروم کیے بغیر انٹرنیٹ کی دنیا میں ان کا تحفظ یقینی بنایا جائے۔

اسلام آباد میں ایک تقریب سے خطاب کرتے ہوئے انہوں نے نوجوانوں کے ذہنوں کے تحفظ کے لیے ٹیکنالوجی پلیٹ فارمز، پالیسی سازوں، سول سوسائٹی، والدین اور حکومت کی مسلسل مشترکہ کوششوں پر زور دیا۔

سوشل میڈیا پر مکمل پابندی کے مطالبات کو مسترد کرتے ہوئے شزہ فاطمہ خواجہ نے خبردار کیا کہ مکمل پابندیاں بچوں کو وی پی این جیسے غیر محفوظ ذرائع استعمال کرکے غلط پلیٹ فارمز کی طرف جانے پر مجبور کرتی ہیں۔

انہوں نے عالمی ٹیکنالوجی کمپنیوں کے ساتھ مل کر عمر کی تصدیق کے مؤثر اور جامع نظام قائم کرنے اور نوعمروں کے لیے پلیٹ فارمز میں موجود حفاظتی خصوصیات پر مؤثر عمل درآمد یقینی بنانے پر زور دیا۔