شنگھائی تعاون تنظیم کا اجلاس، رُکن ممالک کے سربراہان کو دعوت نامے ارسال

دفتر خارجہ نے تصدیق کی ہے کہ شنگھائی تعاون تنظیم کے سربراہان مملکت کی کونسل کے آئندہ اجلاس کے لئے بھارت کے وزیراعظم سمیت ایس سی او رکن ملکوں کے تمام سربراہان حکومت کو دعوت نامے ارسال کردیے ہیں۔

دفتر خارجہ کی ترجمان ممتاز زہرا بلوچ نے آج(جمعرات) اسلام آباد میں اپنی ہفتہ وار نیوز بریفنگ میں کہا کہ ہمیں بعض دعوت ناموں کی توثیق بھی ملی ہے۔

انہوں نے کہا کہ یہ اجلاس پروگرام کے مطابق پندرہ اور سولہ اکتوبر کو اسلام آباد میں ہوگا۔

ایک سوال کے جواب میں ممتاز زہرا بلوچ نے کہا کہ پاکستان کے بھارت کے ساتھ تجارتی تعلقات نہیں ہیں۔

انہوں نے کہا کہ جموں و کشمیر بین الاقوامی طور پر تسلیم شدہ متنازعہ علاقہ ہے۔

ایک سوال کے جواب میں ترجمان نے کہا کہ پاکستان کا کالعدم ٹی ٹی پی کیساتھ مذاکرات کا کوئی ارادہ نہیں ہے۔

چین پاکستان اقتصادی راہداری کے متعلق ایک سوال پر ترجمان نے کہا کہ یہ ایک اہم منصوبہ ہے جس نے پاکستان کی ترقی کے لئے مثبت اور شفاف کردار ادا کیا ہے۔

انہوں نے کہا کہ راہداری منصوبے کو تمام صوبوں اور سیاسی جماعتوں کی حمایت اور مقبولیت حاصل ہے۔