حکومت دکاندار آسان ٹیکس سکیم کے سلسلے میں آگاہی مہم تیز کرے گی، بلال اظہر کیانی

وزیر مملکت برائے خزانہ بلال اظہر کیانی کی زیر صدارت اسلام آباد میں منعقدہ جائزہ اجلاس میں “دکاندار آسان ٹیکس سکیم” کے سلسلے میں آگاہی مہم تیز کرنے کا فیصلہ کیا گیا۔

اجلاس کو بتایا گیا کہ تاجر راہنمائوں کی جانب سے ایف بی آر افسران اور تاجر نمائندوں کے بازاروں کے مشترکہ دوروں کے حوالے سے مقامی تاجر نمائندوں کی فہرستیں مل گئی ہیں۔

وزیر مملکت نے ہدایت کی کہ تاجر نمائندوں کی مدد سے ہر دکاندار تک آسان ٹیکس سکیم کی معلومات پہنچائی جائیں۔

انہوں نے کہا کہ تاجروں کے مطالبے پر عمل کرکے حکومت نے اپنا وعدہ پورا کیا اور اب دکانداروں نے اپنی ہی تیار کردہ سکیم کو کامیاب بنانا ہے۔

اس سکیم کا بنیادی مقصد ٹیکس نیٹ کو وسیع کرنا اور دکانداروں کو سہولت دینا ہے۔