حکومت کا فائیو ای فریم ورک پر جلد عملدرآمد کا فیصلہ

حکومت نے برآمدات، ای پاکستان، ماحول، توانائی اور ایکویٹی اور بااختیار بنانے پر مشتمل لائحہ عمل کی تیاری پر تیزی سے عملدرآمد کا فیصلہ کیا ہے۔

اس حوالے سے فیصلہ جمعرات کے روز اسلام آباد میں وزیر منصوبہ بندی اور ترقی احسن اقبال کے زیرصدارت ایک اجلاس میں کیا گیا۔

اجلاس میں متعلقہ فریقوں کا سیمینار منعقد کرنے کا فیصلہ کیا گیا جس میں اس لائحہ عمل پر عملدرآمد کے لئے نجی شعبے کے ماہرین اور ماہرین تعلیم کی رائے لی جائے گی۔

اس موقع پر گفتگو کرتے ہوئے احسن اقبال نے کہا کہ موجودہ چیلنجز سے نمٹنے کے لئے اقتصادی اور ترقیاتی ترجیحات کا درست تعین منصوبہ بندی کمیشن کی ذمہ داری ہے۔

انہوں نے کہا کہ ملک کو آگے بڑھنے کے لئے اپنی برآمدات اور آمدن کو بڑھانا ہو گا۔ احسن اقبال نے کہا کہ اگلے چھ ماہ میں وزارت منصوبہ بندی کو ڈیجیٹل سسٹم پر منتقل کردیا جائے گا۔