سرکاری سکولز و ہسپتالوں کی آؤٹ سورسنگ غریب عوام کا استحصال ہے، شہباز گجر ایڈووکیٹ

جھنگ: جمعیت علماء اسلام کی مرکزی مجلس شوریٰ کے رکن شہباز گجر ایڈووکیٹ نے کہا ہے کہ پنجاب حکومت کی جانب سے سرکاری سکولوں اور ہسپتالوں کو مرحلہ وار آؤٹ سورس کرنا غریب عوام کے استحصال کے مترادف ہے، تعلیم اور صحت کی بنیادی سہولیات عوام کو مفت فراہم کرنا حکومت کی بنیادی ذمہ داری ہے۔

اپنے ایک اخباری بیان میں شہباز گجر ایڈووکیٹ نے کہا کہ تعلیم اور صحت کے اداروں کو کمرشل بنیادوں پر چلانا حکومت کی آئینی و قانونی ذمہ داریوں سے انحراف ہے۔ ان کے مطابق سرکاری تعلیمی و طبی اداروں کی آؤٹ سورسنگ سے بالخصوص کم آمدنی والے طبقے کے لیے مشکلات میں اضافہ ہو سکتا ہے۔

انہوں نے مطالبہ کیا کہ حکمران طبقہ سرکاری تعلیمی اداروں میں یکساں نصاب، نظامِ تعلیم اور ذریعۂ تعلیم کے نفاذ کے لیے اقدامات کرے اور عوام کو مفت طبی سہولیات کی فراہمی یقینی بنائے۔

شہباز گجر ایڈووکیٹ نے مزید مطالبہ کیا کہ حکومت سرکاری سکولوں اور ہسپتالوں کی آؤٹ سورسنگ کا عمل بند کرے اور تعلیم و صحت کے شعبوں میں عوامی مفاد کو ترجیح دیتے ہوئے بنیادی سہولیات کی فراہمی یقینی بنائے۔