پاکستان کی مدینہ منورہ میں طیبہ بجلی تقسیم اسٹیشن پر حوثی ملیشیا کے حملے کی شدید مذمت

پاکستان نے مدینہ منورہ میں بجلی کی تقسیم کے اسٹیشن طیبہ پر حوثی ملیشیا کے حملے کی شدید مذمت کی ہے۔

دفتر خارجہ کے ترجمان سجاد حیدر خان نے ایک بیان میں کہا کہ مسجد نبویۖ کو بجلی فراہم کرنے والے شہری انفراسٹرکچر کے خلاف یہ قابل مذمت حملہ سنگین اشتعال انگیزی ہے اور دنیا بھر کے کروڑوں مسلمانوں کے لیے گہری تشویش اور دکھ کا باعث ہے۔

ترجمان نے کہا حرمین شریفین کے تقدس اور نمازیوں اور عازمین حج کی سلامتی کا ہر حال میں احترام کیا جانا چاہیے۔

ترجمان نے ایسے غیر ذمہ دارانہ اقدامات کا فوری اور غیر مشروط خاتمہ کرنے کا مطالبہ کیا جو علاقائی امن و سلامتی کے لیے بھی سنگین خطرہ ہیں۔

سجاد حیدر خان نے کہا پاکستان حرمین شریفین، عوام اور زائرین کا تحفظ یقینی بنانے کی کوششوں میں سعودی عرب کے ساتھ مضبوطی سے کھڑا ہے۔

انہوں نے کہا کہ پاکستان خطے میں پائیدار امن و استحکام کے حصول کیلئے پہلے بھی تمام ممکنہ کوششیں کرتا رہا ہے اور آئندہ بھی کرتا رہے گا۔