وزیر خزانہ محمد اورنگزیب کا لاس اینڈ ڈیمیج فنڈ کو فعال بنانے میں سست پیشرفت پر تشویش کا اظہار

وزیر خزانہ محمد اورنگزیب نے لاس اینڈ ڈیمیج فنڈ (Loss and Damage Fund) کو فعال بنانے میں سست پیشرفت پر تشویش کا اظہار کیا ہے۔

نیویارک میں اقوام متحدہ کے زیرِ اہتمام کلائمیٹ فنانس کے حوالے سے ایک ڈائیلاگ میں خطاب کرتے ہوئے انہوں نے گرین کلائمیٹ فنڈ سمیت دیگر بین الاقوامی اداروں پر زور دیا کہ وہ منظوری، ایکریڈیٹیشن اور فنڈز کی فراہمی کے طریقہ کار کو آسان بنائیں، تاکہ موسمیاتی خطرات سے دوچار ممالک کو کلائمیٹ فنانس تک زیادہ مؤثر اور تیز رفتار رسائی حاصل ہو سکے۔

وزیرِ خزانہ نے کہا کہ حکومت کی ذمہ داری ہے کہ قابلِ اعتماد موسمیاتی موافقت اور آفات سے نمٹنے کے فریم ورک، ابتدائی انتباہی نظام، موسمیاتی حکمتِ عملیوں اور قابلِ عمل منصوبوں کو تشکیل دے۔ انہوں نے اس امر پر زور دیا کہ موسمیاتی تبدیلیوں سے نمٹنے کی صلاحیت کا آغاز ملکی معاشی استحکام، مناسب مالیاتی گنجائش اور بیرونی مالیاتی بفرز سے ہونا چاہئے، جبکہ بین الاقوامی تعاون کو قومی وسائل کا معاون ہونا چاہئے۔