وزیر خزانہ کا پاکستان اور نیدرلینڈز کے درمیان تجارتی شراکت داریوں کے فروغ پر زور

وزیر خزانہ محمد اورنگزیب نے کہا ہے کہ پاکستان اور نیدرلینڈز کی کاروباری برادری کے درمیان مسلسل رابطے سے تجارتی لحاظ سے قابل عمل سرمایہ کاری کے مواقع کی نشاندہی، شراکت داریوں کے فروغ اور سرمایہ کاروں کا اعتماد بڑھانے میں مدد ملے گی۔

وہ آج اسلام آباد میں فاؤنڈرز کاربن نیٹ ورک کی قیادت میں نیدرلینڈز کے کاروباری وفد کے اعزاز میں دیے گئے ظہرانے سے خطاب کر رہے تھے۔ نیدرلینڈز کے سفیر رابرٹ جان سیگرٹ بھی وفد کے ہمراہ تھے۔

محمد اورنگزیب نے پاکستان اور نیدرلینڈز کے درمیان قریبی اقتصادی تعاون کے مواقع اجاگر کرتے ہوئے کہا کہ نیدرلینڈز کا تجربہ، ٹیکنالوجی اور سرمایہ کاری اہم شعبوں میں پاکستان کی ترقیاتی ترجیحات کو پورا کرنے میں معاون ثابت ہو سکتے ہیں۔

انہوں نے نجی سرمائے کو متحرک کرنے، خصوصی مہارت سے استفادہ کرنے اور سرمایہ کاری میں دلچسپی کو تجارتی لحاظ سے قابل عمل منصوبوں میں تبدیل کرنے کے لیے سرکاری و نجی شراکت داری کو اہم ذریعہ قرار دیا۔

نیدرلینڈز کے وفد کے ارکان نے پاکستان کے کاروباری ماحول اور دوطرفہ تعاون کو وسعت دینے کے امکانات کے بارے میں اپنے خیالات کا اظہار کیا۔