وزیرخزانہ کا اقتصادی ترقی میں تیزی کیلئے کارپوریٹ فارمنگ کی ضرورت پر زور

وفاقی وزیر خزانہ محمد اورنگزیب نے اقتصادی ترقی کا عمل تیز کرنے کیلئے خصوصی سرمایہ کاری سہولت کونسل کے ساتھ ملکر کارپوریٹ فارمنگ کی ضرورت پر زور دیا ہے۔

انہوں نے آج (منگل ) کو کراچی میں پاکستان بینکس ایسوسی ایشن کی ایگزیکٹو کمیٹی سے خطاب کرتے ہوئے کہاکہ زراعت پر توجہ مرکوز رکھنا اور خصوصی سرمایہ کاری سہولت کونسل جیسے معاون اقدامات جاری رکھنا انتہائی ضروری ہے۔

محمد اورنگزیب نے کہاکہ یہ بات حوصلہ افزاء ہے کہ نجی شعبہ مالیاتی اور ٹیکنالوجی کے بنیادی ڈھانچے کو بہتر بنانے کیلئے موثر اقدامات کررہا ہے۔

وفاقی وزیر نے کہا کہ حکومت آئی ایم ایف کے ساتھ مسودہ قرارداد پر آگے بڑھ رہی ہے۔

انہوں نے کہاکہ حکومت موجودہ مسائل سے آگاہ ہے تاہم آئی ایم ایف کی جانب سے منظوری دئیے جانے کے بعد صورتحال پر قابو پایا جاسکتا ہے۔