پاکستان کا تنازعات کے پرامن حل کیلئے عالمی کوششوں میں تیزی لانے کا مطالبہ

پاکستان نے کہا ہے کہ ‘تحفظ کی ذمہ داری’ (R2P) کے فریم ورک کی سب سے بڑی ناکامی طویل تنازعات اور غیر ملکی قبضے کی ان صورتحال میں عیاں ہے، جہاں بین الاقوامی برادری کی توجہ کے باوجود بلا خوفِ احتساب مظالم کا سلسلہ جاری ہے۔

اقوام متحدہ کی جنرل اسمبلی میں ‘تحفظ کی ذمہ داری’ اور نسل کشی، جنگی جرائم، نسلی صفائی اور انسانیت کے خلاف جرائم کی روک تھام پر ہونے والی بحث کے دوران اقوام متحدہ میں پاکستان کے مستقل مندوب سفیر عاصم افتخار احمد نے کہا کہ “ایسا دوبارہ کبھی نہیں (Never Again) کا وعدہ تاحال پورا نہیں ہو سکا ہے اور بڑے پیمانے پر ہونے والے مظالم کے متاثرین کے لیےنہ کوئی ذمہ داری، نہ تحفظ اور نہ ہی احتساب  کا کوئی نظام موجود ہے۔

انہوں نے بین الاقوامی برادری پر زور دیا کہ وہ سلامتی کونسل کے ایجنڈے میں شامل طویل عرصے سے جاری تنازعات اور دیرینہ مسائل کو، سلامتی کونسل کی متعلقہ قراردادوں اور بین الاقوامی قانونی حیثیت کے مطابق پرامن طریقے سے حل کرنے کی کوششوں میں تیزی لائے۔