وزیراعظم کا دہشت گردی کے مکمل خاتمے کے غیرمتزلزل عزم کا اعادہ

وزیراعظم شہبازشریف نے سے دہشت گردی کے مکمل خاتمے کے غیرمتزلزل عزم کا اعادہ کیا ہے۔وہ آج (جمعرات) کوئٹہ میں قومی لائحہ عمل کی صوبائی اپیکس کمیٹی کے اجلاس سے خطاب کر رہے تھے۔بلوچستان میں گزشتہ پیر کو ہونے والے دہشت گردی کے افسوسناک واقعات کا حوالہ دیتے ہوئے وزیراعظم نے کہا کہ صوبے کی ترقی اور خوشحالی کی راہ میں حائل تمام رکاوٹوں کو اجتماعی عزم اور ویژن سے دور کیا جائے گا۔انہوں نے کہا کہ بلوچستان میں دہشت گردی کے حالیہ واقعات پر پوری قوم رنجیدہ ہے۔وزیراعظم نے کہا کہ دہشت گرد تنظیموں اور خوارج کی جانب سے ایک مذموم منصوبہ تیار کیا گیا جس کے نتیجے میں فرنٹیئر کانسٹیبلری اور لیویز کے افسر ،سپاہی اور شہری شہید ہوئے۔ انہوں نے کہا کہ ان کی قربانیاں رائیگاں نہیں جائیں گی۔شہبازشریف نے کہا کہ 2018ء کے بعد دوبارہ سر اٹھانے والی دہشت گردی کو نہ صرف بلوچستان اور خیبرپختونخوا بلکہ ملک کے دیگر حصوں میں بھی کچل دیا جائے گا۔انہوں نے کہا کہ ہم قائداعظم محمد علی جناح اور علامہ اقبال کے نقش قدم پر چل کر ملک کو دوبارہ ترقی اور خوشحالی کی راہ پر گامزن کریںگے۔

بعدازاں صوبائی اپیکس کمیٹی کے اختتامی اجلاس سے خطاب کرتے ہوئے شہبازشریف نے دوٹوک الفاظ میں کہا کہ دہشت گردوں کے ساتھ کوئی رعایت نہیں برتی جائے گی۔وزیراعظم نے کہا کہ دہشت گرد ملک کے دشمن ہیں اور ان کا مکمل خاتمہ ہمارا مذہبی اور سیاسی فریضہ ہے اور پاکستان کی ترقی اور خوشحالی کے لئے ناگزیر ہے۔تاہم انہوں نے کہا کہ پاکستان کے آئین اور قومی پرچم کا تقدس رکھنے والوں کے ساتھ بات چیت وقت کی اہم ضرورت ہے۔