تمام کشمیری سیاسی رہنماؤں، کارکنوں کو رہاکیا جائے،آغاسید حسن علی موسوی

کل جماعتی حریت کانفرنس کے سینئر رہنما آغا سید حسن الموسوی الصفوی نے گزشتہ کئی سالوں سے جیلوں میں بند تمام کشمیری سیاسی رہنماؤں اور کارکنوں کی رہائی کا مطالبہ کیا ہے۔ کشمیر میڈیاسروس کے مطابق آغا موسوی نے بڈگام میں مرکزی امام بارگاہ میں منعقدہ ایک تقریب سے خطاب کرتے ہوئے میر واعظ عمر فاروق کی چار سالہ نظربندی سے رہائی کا خیرمقدم کیا۔ دریں اثنا، بھارتی فوج کی راشٹریہ رائفلز اور سینٹرل ریزرو پولیس فورس کے اہلکاروں نے ضلع کولگام کے مختلف علاقوں میں سرچ آپریشن اور گھروں پر چھاپوں کے دوران پانچ نوجوانوں کو گرفتار کر لیا۔ سوشل میڈیا صارفین پر پابندیاں تیز کرنے کی کوشش میں، ہندوستانی پولیس کو ہندوستان مخالف سرگرمیوں کی نگرانی کے نام پر تمام کشمیریوں کے اکاؤنٹس کو ٹریک کرنے کی مفت رسائی دی گئی ہے۔ دریں اثنا، مقبوضہ جموں و کشمیر میں سول سوسائٹی کے کارکنوں نے سری نگر میں ایک اجلاس میں بھارت اور پاکستان پر زور دیا کہ وہ جنوبی ایشیائی خطے میں امن، سیاسی اور اقتصادی استحکام کی خاطر مل بیٹھ کر تنازعہ کشمیر کو حل کریں۔