وزارت داخلہ نے پروف آف رجسٹریشن (PoR) کارڈ ہولڈر افغان شہریوں کی وطن واپسی سے متعلق اہم فیصلہ کرتے ہوئے نوٹیفکیشن جاری کر دیا ہے۔ جاری کردہ نوٹیفکیشن کے مطابق رضاکارانہ واپسی کا عمل فوری طور پر شروع کیا جا رہا ہے، جبکہ باقی ماندہ پی او آر ہولڈرز کی واپسی کا مرحلہ یکم ستمبر 2025 سے باقاعدہ طور پر شروع کیا جائے گا۔

یہ فیصلہ ایک اعلیٰ سطحی اجلاس میں کیا گیا، جس میں ملک میں سیکیورٹی خدشات اور وسائل پر بڑھتے دباؤ کو مدنظر رکھتے ہوئے افغان مہاجرین کی مرحلہ وار واپسی کی منظوری دی گئی۔

نوٹیفکیشن کے مطابق، افغان سٹیزن کارڈ ہولڈرز کی واپسی پہلے سے جاری IFRP فیصلے کے مطابق جاری رہے گی۔ اس عمل میں وزارت خارجہ اقوام متحدہ کے ادارہ برائے مہاجرین (UNHCR)، افغان عبوری حکومت اور دیگر بین الاقوامی شراکت داروں سے رابطہ و تعاون جاری رکھے گی۔

وزارت سیفران، وزارت امور کشمیر و گلگت بلتستان کو ہدایت کی گئی ہے کہ وہ پی او آر ہولڈرز کا مکمل ڈیٹا متعلقہ صوبائی اور ضلعی کمیٹیوں کو فراہم کریں۔ نادرا کو ٹرانزٹ ایریاز اور بارڈر ٹرمینلز پر واپسی کے عمل میں شامل افراد کی رجسٹریشن ختم کرنے کے انتظامات کرنے کی ہدایت جاری کر دی گئی ہے۔

نوٹیفکیشن میں کہا گیا ہے کہ ایف آئی اے نامزد بارڈر کراسنگ پوائنٹس پر وطن واپسی کے عمل کو سہولت فراہم کرے گا۔ تمام صوبائی حکومتوں اور متعلقہ ایجنسیوں کو پی او آر ہولڈرز کی میپنگ مکمل کرنے اور اس کے لیے صوبائی ایکشن پلان تشکیل دے کر وزارت داخلہ سے شیئر کرنے کی ہدایت کی گئی ہے۔

مزید برآں، جلاوطن افراد کے لیے مخصوص ٹرانزٹ ایریاز، نقل و حمل اور مالی معاونت کا بھی انتظام کیا جائے گا۔ ضلعی و صوبائی سطح پر کمیٹیاں تشکیل دینے اور کنٹرول رومز کو دوبارہ فعال کرنے کا فیصلہ بھی کیا گیا ہے۔ عوامی شکایات کے ازالے کے لیے ہاٹ لائن اور شکایتی سیل بھی قائم کیا جائے گا۔

واپسی کے عمل کی یومیہ نگرانی فارن نیشنل سیکیورٹی ڈیش بورڈ (FNSD) کرے گا، جب کہ تمام اسٹیک ہولڈرز سے درخواست کی گئی ہے کہ وہ اپنے فوکل پرسنز کی تازہ ترین تفصیلات فوری طور پر وزارت داخلہ کے ساتھ شیئر کریں۔

رابطہ کاری کے لیے وزارت داخلہ کے سیکشن آفیسر (سکیورٹی) کو فوکل پرسن مقرر کیا گیا ہے۔