آذربائیجان کے صدر الہام علیوف نےاتوار کی شام وزیراعظم محمد شہبازشریف کو ٹیلی فون کیا اور کاراباخ کے مسئلے پرآذربائیجان کے لئے پاکستان کی دیرینہ اورمسلسل حمایت کو بھرپور انداز میں سراہا۔

وزیراعظم نے واشنگٹن ڈی سی میں آرمینیا کے ساتھ تاریخی امن معاہدہ طے پانے پر آذربائیجان کے صدر اور عوام کو دلی مبارکباد دی۔

انہوں نے آذربائیجان اور آرمینیا کے درمیان تین عشروں پرانے تنازعے کے پرامن خاتمے میں صدر الہام علیوف کے بصیرت افروز کردار کی تعریف کی۔

وزیراعظم نے کہا کہ پاکستانی عوام اس بنیادی مسئلے پر اپنے آذربائیجانی بھائیوں اور بہنوں کے ساتھ ہیں ۔

انہوں نے کہا کہ یہ بات خوش آئند ہے کہ صدر علیوف کی جرات مندانہ قیادت اور مدبرانہ قیادت میں اس خطے میں بالآخر امن قائم ہو گیا۔

وزیراعظم نے اس تاریخی معاہدے میں امریکی صدر ڈونلڈ ٹرمپ کے کردار کو خاص طور پر سراہا۔

 صدر علیوف نے وزیراعظم کا شکریہ ادا کرتے ہوئے کہا کہ خطے میں پرامن ترقی سے پاکستان اور وسطی ایشیا کے درمیان وسیع تر روابط کے نئے مواقع پیدا ہوں گے۔

دونوں رہنماؤں نے دوطرفہ تعاون میں مثبت رجحان پر بھی اطمینان کا اظہار کیا اور اسے جاری رکھنے کے عزم کا اعادہ کیا۔

لاچن اور خانکنڈی میں حالیہ بات چیت کا ذکر کرتے ہوئے، وزیر اعظم نے صدر علیوف کو جلد ہی پاکستان کا سرکاری دورہ کرنے کی اپنی دعوت کا اعادہ کیا۔

دونوں رہنماؤں کی شنگھائی تعاون تنظیم کے سربراہی اجلاس کے موقع پر تیانجن میں ملاقات بھی متوقع ہے۔