پاکستان اور ایشیائی ترقیاتی بینک نے آج(منگل) کلائمیٹ اینڈ ڈیزاسٹر ریسیلینس انہانسمنٹ پروگرام کے حوالے سے پچاس کروڑ ڈالر کے قرض کے ایک تاریخی معاہدے پر دستخط کئے ہیں۔سیکرٹری وزارت اقتصادی امور ڈاکٹر کاظم نیاز اور کنٹری ڈائریکٹر، پاکستان ریذیڈنٹ مشن، ایشیائی ترقیاتی بینک ایما فین نے آج اسلام آباد میں ایک تقریب میں معاہدے پر دستخط کئے۔اس معاہدے کے حوالے سے وزارت اقتصادی امور کو رضامندی دیتے ہوئے وفاقی وزیر احد چیمہ نے کہا کہ معاہدے پر دستخط سے ماحولیاتی تبدیلی کے اقدامات کو ترجیح دینے اور خطرات سے نمٹنے کی سوچ استعمال کرتے ہوئے آفات کا خطرہ کم کرنے کیلئے پاکستان کے عزم کا اظہار ہوتا ہے۔

ایشیائی ترقیاتی بینک نے پاکستان میں موسمیاتی تبدیلیوں اور قدرتی آفات سے تحفظ کے لیے 50 کروڑ ڈالر کی پالیسی پر مبنی قرضے کی  گزشتہ روزمنظوری دی گئی تھی ۔

موسمیاتی اور آفات سے تحفظ کے اضافے کا پروگرام

یہ منصوبہ پاکستان کی ادارہ جاتی صلاحیت کو مضبوط بنانے، منصوبہ بندی، تیاری، اور فوری ردعمل کو بہتر بنانے کے ساتھ ساتھ سرمایہ کاری کو موسمیاتی تبدیلیوں کے خطرات سے نمٹنے کے لیے بڑھانے میں مدد دے گا۔ اس پروگرام کے تحت قدرتی آفات کے مالی خطرات کو کم کرنے کے لیے جدید حکمت عملی اپنائی جائے گی۔

پاکستان کے لیے چیلنجز

پاکستان ایشیا اور پیسفک کے خطے میں موسمیاتی تبدیلیوں اور قدرتی آفات کے خطرات کا شکار ممالک میں سے ایک ہے۔ ہر سال قدرتی آفات سے ہونے والے نقصانات کا اوسط تخمینہ 2 ارب ڈالر سے زائد ہے۔ خواتین اور دیگر کمزور طبقات ان آفات سے سب سے زیادہ متاثر ہوتے ہیں۔

اے ڈی پی کا کردار

اے ڈی پی کے مرکزی اور مغربی ایشیا کے ڈائریکٹر جنرل ییوگینی ژوکوف کے مطابق یہ پروگرام پاکستان میں موسمیاتی اور آفات سے متعلق خطرات کو سمجھنے اور کم کرنے کے اے ڈی پی کے دیرینہ کام کو آگے بڑھاتا ہے۔ ہم جامع حکمت عملی کے ساتھ پاکستان کی مدد کر رہے ہیں تاکہ موسمیاتی اور آفات کے خطرات کو مؤثر طریقے سے نمٹایا جا سکے۔

اہم پہلو

  قدرتی آفات سے تحفظ کے لیے بہتر منصوبہ بندی اور سرمایہ کاری۔

  صنفی مساوات کو مدنظر رکھتے ہوئے منصوبہ بندی اور عوامی سرمایہ کاری۔

  مقامی گرین صکوک (اسلامی بانڈز) کے ذریعے نجی اور عوامی ذرائع سے مالی وسائل کا حصول۔

  زراعت کے بیمہ جیسے خطرہ منتقلی کے حل کے لیے یکجہتی فنڈ کا قیام۔

  قدرتی آفات کی صورت میں متاثرہ افراد کو نقد امداد فراہم کرنے کے لیے سوشل پروٹیکشن سسٹم۔

اے ڈی پی نے اس منصوبے کے نفاذ کے لیے 10 لاکھ ڈالر کی تکنیکی امداد بھی فراہم کی ہے۔

پاکستان اور اے ڈی پی کا اشتراک

پاکستان 1966 میں اے ڈی پی کا بانی رکن تھا اور تب سے اب تک اے ڈی پی نے پاکستان میں 52 ارب ڈالر سے زائد کی امداد فراہم کی ہے، جس کا مقصد اقتصادی ترقی، انفراسٹرکچر، توانائی، خوراک کی سلامتی، اور سماجی خدمات کی بہتری ہے۔

اے ڈی پی کی ترجیحات

اے ڈی پی ایشیا اور پیسفک میں خوشحال، پائیدار اور جامع ترقی کے لیے پرعزم ہے اور خطے سے غربت کے خاتمے کے لیے مسلسل کوششیں جاری رکھے ہوئے ہے۔