جھنگ: مختلف ٹریفک حادثات میں ایک شخص جاں بحق، 8 زخمی، ریسکیو 1122 نے بروقت کارروائی کرتے ہوئے ہسپتال منتقل کر دیا

جھنگ: ضلع جھنگ کے مختلف علاقوں میں پیش آنے والے تین الگ الگ ٹریفک حادثات میں ایک شخص جاں بحق جبکہ 8 افراد زخمی ہوگئے۔ ریسکیو 1122 کے مطابق تمام حادثات میں مبینہ طور پر تیز رفتاری، غفلت اور لاپرواہی کو وجہ بتایا گیا، ریسکیو ٹیموں نے بروقت رسپانس کرتے ہوئے زخمیوں کو ابتدائی طبی امداد فراہم کی اور ہسپتال منتقل کیا۔

ریسکیو 1122 کے مطابق فیصل آباد پھاٹک، فیصل آباد روڈ پر پٹڑی پر چلنے والا ٹھیلا تیز رفتاری کے باعث بے قابو ہو کر الٹ گیا، جس کے نتیجے میں 4 افراد زخمی ہوئے۔ زخمیوں میں خانewال کے رہائشی 55 سالہ شہباز ولد رنگ علی کو ڈی ایچ کیو ہسپتال جھنگ منتقل کیا گیا جبکہ 40 سالہ سعید ولد صادق، 38 سالہ وسیم ولد شبیر اور 33 سالہ ذیشان ولد امیر کو موقع پر ابتدائی طبی امداد فراہم کی گئی۔

دوسرا حادثہ چنڈ بھروانہ، سرگودھا روڈ پر پیش آیا جہاں کراسنگ کے دوران ایک کار کی موٹر سائیکل سے ٹکر ہوگئی۔ حادثے میں 33 سالہ سرفراز ولد محمد نواز، 35 سالہ شازیہ بی بی زوجہ ممتاز حسین اور 42 سالہ ممتاز حسین ولد الطاف حسین زخمی ہوئے، جنہیں ریسکیو اہلکاروں نے ابتدائی طبی امداد کے بعد آر ایچ سی ہویلی شیخ راجو منتقل کیا۔

تیسرا حادثہ بھکر روڈ جھنگ پر ملوآنہ موڑ کے قریب ٹوٹل پمپ کے سامنے پیش آیا، جہاں ہنڈائی ڈالے اور ٹرک کے درمیان تصادم کے نتیجے میں ایک شخص جاں بحق اور ایک زخمی ہوگیا۔ ریسکیو 1122 کے مطابق 28 سالہ قیصر عباس ولد غلام محمد، سکنہ احمد پور سیال، موقع پر ہی دم توڑ گیا، جس کی لاش ڈی ایچ کیو ہسپتال جھنگ منتقل کر دی گئی، جبکہ 36 سالہ عمار اسلم ولد محمد اسلم، سکنہ چوک اعظم لیہ، کو زخمی حالت میں ڈی ایچ کیو ہسپتال جھنگ منتقل کیا گیا۔

ریسکیو 1122 کے مطابق تینوں حادثات میں مجموعی طور پر 9 افراد متاثر ہوئے، جن میں ایک جاں بحق اور 8 زخمی شامل ہیں۔ ریسکیو ٹیموں نے تمام واقعات پر بروقت کارروائی کرتے ہوئے متاثرین کو طبی امداد اور ہسپتال منتقلی کی سہولت فراہم کی۔