کاروباری سرگرمیوں میں آسانی اور سرمایہ کاری کے فروغ کے لیے ریگولیٹری اصلاحات ناگزیر ہیں، وزیراعظم

وزیراعظم محمد شہباز شریف نے کہا ہے کہ حکومت کاروباری برادری کو سہولت فراہم کرنے اور غیر ضروری ضابطہ کاری کے خاتمے کے لیے مؤثر اقدامات کر رہی ہے۔

وہ آج اسلام آباد میں کاروبار میں آسانی سے متعلق ریگولیٹری اصلاحات کے لیے ایک اجلاس کی صدارت کر رہے تھے۔

وزیراعظم نے کہا کہ کاروباری سرگرمیوں میں آسانی اور سرمایہ کاری کے فروغ کے لیے ریگولیٹری اصلاحات ناگزیر ہیں۔

انہوں نے کہا کہ ڈرگ ریگولیٹری اتھارٹی آف پاکستان کو جدید خطوط پر استوار کیا گیا ہے اور اسی طرز پر دیگر ریگولیٹری اداروں میں بھی اصلاحات لائی جائیں۔

شہباز شریف نے ہدایت کی کہ ریگولیٹری رجسٹری تشکیل دی جائے تاکہ ملک میں موجود تمام ریگولیٹری تقاضوں اور قواعد و ضوابط کو ایک جامع نظام کے تحت مرتب کیا جا سکے۔

انہوں نے کہا کہ کاروبار میں آسانی کے لیے آسان کاروبار ایکٹ کو ملک بھر میں نافذ کیا جائے تاکہ تمام صوبوں میں ریگولیٹری نظام میں ہم آہنگی پیدا ہو اور کاروباری افراد کو یکساں سہولیات میسر آئیں۔